Guhkkin davvin Dávggáid vuolde
sabmá suolggai Sámieanan.
Gullu jupmamin «kirdno» seinniid gaskkas. Juohke mánná lávlu buot maid čoddat guoddá. Gullat maid oahpaheddjiid sevdnjes bássajienaid mánnáguora čuvges nohtaid gaskal. Nuorat, geat álo čoahkálit maŋábeallai, ain de muhtumin gullojit, maŋŋá go oahpaheaddji boahtá viđát háve nuoraid jietnavoluma váidalit. Nuorat de lávlugohtet dievva čoddagiin ja dádjugohtet seammás go oahpaheaddji jorggiha fas.
Sámisohka sieluin mielain
eahccá datte eatnamiiddis.
Lávlla joatká. Mánát, nuorat ja oahpaheaddjit jotket lávlumis sámi soga lávlaga. Lávlaga man sámeskuvlla mánát ja nuorat leat lávlon dan rájes go skuvla álggii. Oahpaheaddjit leat dán lávlaga oahppan, go sii ledje skuvlamánát, sin oahpaheddjiin, geat fas sin oahpaheddjiin ja váhnemiin leat dan oahppan. Lávlaga man nuorat leat ferten iežas rattiin lávlut dan rájes go skuvlii álge. Lávlaga man sin oahppit ja mánát galge oahppat jus máilbmi dan háliida.
Gollin čuvget čáhcelottit,
silban šovvot sámieanut,
šelgot čuoimmit, šleđgot áirrut
Ođđa vearsa lea fargga geargan. Nuorat leat jámas dolkan dán boares, njoazes lávlaga lávlumis. Jagi jagi maŋŋá leat dán lávlon. Ja jagi jagiid maŋŋá galget mánát gaskal guhtta ja 16 jagi dán lávlut.
Sámieatnan sohkagoddi –
dat lea gierdan doddjokeahttá
goddi čuđiid, garrogávppiid,
viehkes vearrevearroválddiid.
Geahčastan bajás. Moadde nuohta fas njálbmeráigge olggus bohtet. Vuorddán bottu dál.
Dál lahkonišgoahtá maŋimuš vearsa! Dasa mii liikot. Buohkat. Sihke mánát, nuorat ja oahpaheaddjit. Go fargga lea borranboddu, ja mii beassat boradit. Dasa mii buohkat illudit.
Maŋimuš vearsa mun dál vuorddán, go dasa liikon. Mun liikon sániid ja cealkagiid mearkkašumiid. Nu čábbát čallon! Ja dalle ii leat šat guhká dassážii go leat geargan.
Sámieatnan sámiide!
Guokte maŋimuš sáni leat lávlojuvvon. Buohkaid jietna rievdá lávlumis šurramii. Dál mii leat fas farga gárvvis boahtte sámiid álbmot beaivái, gos mii, nu go juohke jagi, áigut Sámi Soga lávlaga lávlut. Muhto vuosttažin mii fertet dan čađa ihttin vel lávlut!
Dedonuorat 